Sáttmáli 2011

millum

S & K 

& 

Føroya Arbeiðsgevarafelag 

Innihaldsyvirlit

Kapittul 1: Sáttmálaøkið......................................................................................................................................... 3
§ 1.  Sáttmálaøkið.................................................................................................................................................. 3
Kapittul 2: Arbeiðstíð............................................................................................................................................... 3
§ 2 Vanlig arbeiðstíð............................................................................................................................................. 3
§ 3 Mattíðir............................................................................................................................................................. 3
§ 4 Skrivstovuarbeiði og klinikassistentar........................................................................................................ 4
§ 5 Frídagar............................................................................................................................................................. 4
Kapittul 3: Løn........................................................................................................................................................... 4
§ 6 Almenn lønarviðurskifti................................................................................................................................. 4
§ 7 Tímalønin......................................................................................................................................................... 5
§ 8 Viðbøtur – forskotin tíð................................................................................................................................. 5
§ 9 Vaktarhald........................................................................................................................................................ 5
§ 10 Úrtíðararbeiði................................................................................................................................................ 5
§ 11 Avspáking...................................................................................................................................................... 6
§ 12 Parttíðarsett.................................................................................................................................................... 7
§ 13 Fyribilshjálp................................................................................................................................................... 7
§ 14 Persónlig viðbót til klinikassistentar......................................................................................................... 7
§ 15 Løn fyri skeiðluttøku og eftirútbúgving.................................................................................................... 7
§ 16 Starvsaldur..................................................................................................................................................... 8
Kapittul 4: Setanarviðurskifti................................................................................................................................ 8
§ 17 Lógarfest starvsfólkaviðurskiftir og frítíðarløn....................................................................................... 8
§ 18 Fastlønt........................................................................................................................................................... 9
§ 19 Lærlingar........................................................................................................................................................ 9
§ 20 Uppsøgn....................................................................................................................................................... 10
Kapittul 5: Onnur gjøld.......................................................................................................................................... 10
§ 21 Limagjald, lívstrygging og eftirløn........................................................................................................... 10
Kapittul 6: Skipanarviðurskifti........................................................................................................................... 11
§ 22 Samstarvsviðurskifti.................................................................................................................................. 11
§ 23 Nevndararbeiði og álitismannaskipan..................................................................................................... 11
§ 24 Arbeiðssteðgur............................................................................................................................................ 11
§ 25 Gerðarrættur................................................................................................................................................ 12
§ 26 Semingsstovnurin....................................................................................................................................... 12
Kapittul 7: Aðrar ásetingar.................................................................................................................................. 12
§ 27 Arbeiðsklæðir.............................................................................................................................................. 12
Kapittul 8: Gildisskeið........................................................................................................................................... 13
§ 28.  Gildisskeið................................................................................................................................................. 13
Álitismannaskipan fyri S&K-limir...................................................................................................................... 14

Kapittul 1: Sáttmálaøkið

§ 1.  Sáttmálaøkið  

Stk. 1. Hesin sáttmáli umfatar kramba- og skrivstovufólk og tekniskt starvsfólk og arbeiði av líknandi slag í Føroyum (í tí fylgjandi felagsnevnd starvsfólk) umframt lærlingar á hesum øki. Tó hava lærligar ikki rætt til at fara í verkfall.

Stk. 2. Sáttmálin fevnir tó ikki um fólk í leiðandi starvi ella fólk, hvørs støða hjá arbeiðsgevaranum er av tílíkum slagi, at hon gevur rætt til at disponera í stóran mun bindandi fyri arbeiðsgevaran. Hettar forðar tó ikki fyri, at hesi starvsfólk kunna vera limir í S & K felagnum

Kapittul 2: Arbeiðstíð

§ 2 Vanlig arbeiðstíð

Stk. 1. Vanliga arbeiðstíðin er 40 tímar um vikuna í meðal, umframt mattíð, í einum tíðarskeiði uppá 8 vikur sambært arbeiðsætlan. Annars er arbeiðstíðin 40 tímar um vikuna.
Tá arbeiðsfólk møtir til arbeiðis, og arbeiði varar styttri enn 2 tímar, skulu tey hava løn fyri 2 tímar.

§ 3 Mattíðir

Stk. 1. Starvsfólk, sum arbeiða fleiri enn 5 tímar um dagin, hava rætt til døgurðasteðg, sum er minst 20 minuttir.

Stk. 2. Um starvsfólk eru til taks hjá arbeiðsgevaranum í steðginum skal henda mattíð ikki dragast frá arbeiðstíðini.

§ 4 Skrivstovuarbeiði og klinikassistentar

Stk. 1. Fyri vanligt arbeiði á skrivstovum er arbeiðstíðin 40 tímar um vikuna og skal vanliga arbeiðstíðin liggja millum kl. 7 á morgni og 18 á kvøldi, frá mánadegi til og við fríggjadegi.  Miðað verður ímóti, at dagliga arbeiðstíðin er 8 tímar.

Stk. 2. Við flekstíðararbeiði verður ikki goldnar viðbøtur sambært §8, stk. 2.

Stk. 3. Hesar ásetingar viðvíkjandi arbeiðstíð eru eisini galdandi fyri klinikassistentar á tannlæknastovum.

§ 5 Frídagar

Stk.1. Nýggjarsaftan, páskaaftan, hvítusunnuaftan, grundlógardagur, ólavsøkuaftan og flaggdagur eru hálvir frídagar.

Stk. 2. Allir halgidagar, Jólaaftan og Ólavsøkudagur eru heilir frídagar.

Stk. 3. Verður arbeitt frammanfyri nevndu frídagar ella aftaná kl. 12.00 á nevndu hálvu frídøgum, verður goldin tímaløn + 100%.

Kapittul 3: Løn

§ 6 Almenn lønarviðurskifti

Stk. 1. Lønin er samsvarandi lønartalvu aftast í hesum sáttmála.

Stk. 2. Lønin hjá mánaðarløntum skal gjaldast starvsfólkunum í seinasta lagi seinasta yrkadag í mánaðinum.
Tímalønt fáa løn útgoldna í minsta lagi aðru hvørja viku, um ikki annað er avtalað.

Stk. 3. Tað starvsfólk, ið hevur hægri løn, tá hesin sáttmáli kemur í gildi, verður ikki sett niður í løn.

Stk. 4. Arbeiðsgevari hevur skyldu til at geva starvsfólki sínum lønarseðlar.

§ 7 Tímalønin

Stk. 1. Tímalønin verður útroknað sum samlaða mánaðarlønin hjá viðkomandi dividerað við 173,33.

Stk. 2. Tímalønt eiga rætt til løn fyri hvørjar byrjaðar 15 minuttir tey arbeiða.

Stk. 3. Fyri arbeiði út yvir vanligu arbeiðstíðina verður at samsýna við niðanfyri nevndu ásetingum um løn fyri forskotna arbeiðstíð og yvirtíð.

Stk. 4. Tó fáa tímalønt altíð yvirtíðarløn, tá tey hava arbeitt yvir 80 tímar í tvær vikur.

§ 8 Viðbøtur – forskotin tíð

Stk. 1. Fyri arbeiði innan fyri vanliga vikuliga arbeiðstíð uppá 40 tímar verður at samsýna fyri forskotnað arbeiðstíð soleiðis: 

Kl.  19.30 - 24.00                                             kr.                  6,00          eyka um tíman
Leygardag kl. 14.30 - 24.00                              kr.                10,25          eyka um tíman
Sunnu- og halgid. kl 6.30 - 24.00                     kr.                13,00          eyka um tíman
Allar dagar kl. 24.00 – 06.30                            kr.                15,00          eyka um tíman 

 § 9 Vaktarhald

Starvsfólk, sum hevur tilkallivakt, verður frá mánadegi til og við fríggjadag kl. 24.00 lønt við 15,00 kr um tíman. Frá fríggjadegi kl. 24.00 til vanliga arbeiðstíð mánamorgun verður starvsfólk lønt við 30.00 kr. um tíman.

§ 10 Úrtíðararbeiði

Stk. 1. Yvirtíð verður goldin fyri hvørjar byrjaðar 15 minuttir, sum arbeitt verður yvir. Fyri úrtíðararbeiði verður at gjalda: 

          a.  Fyri teir fyrstu 3 tímarnar:                 tímaløn + 35% eyka
          b.  Fyri 4. tíman og fylgjandi:                tímaløn + 60% eyka 
          c.  Sunnu- og halgidagar:                       tímaløn + 100% eyka

Stk. 2. Skrivstovuarbeiði, sum ikki er fevnt av stk. 3 út yvir 40 tímar um vikuna, verður roknað sum yvirtíð sambart stk. 1.

Stk. 3 Yvirtíðarløn verður goldin eftir stk. 1 um:

1.     Arbeitt verður meira enn 11 tímar hvønn dagin, soleiðis at yvirtíðarløn tá verður goldin fyri teir tímar sum fara upp um 8 tímar hendan dag ella

2.     arbeitt verður meira enn 48 tímar eina viku, soleiðis at yvirtíðarløn tá verður goldin fyri teir tímar sum fara upp um 48 tímar hesa vikuna.
Um starvsfólk hevur arbeitt meira enn 11 tímar ein ella fleiri av døgunum í einari viku, og samstundis hevur arbeitt meira enn 48 tímar í alt í somu viku, so verður tann hægra av frammanfyri nevndu yvirtíðarlønum 1 ella 2 goldin.

Stk. 4. Tað verður bert goldið fyri úrtíðararbeiði, um hetta er útint eftir beinleiðis boðum arbeiðsgevarans ella umboðsfólki hansara.

Stk. 5. Miðað verður ímóti, at arbeiðsgevarin dagin fyri boðar starvsfólki frá, um ætlanin er at yvirtíðararbeiði skal fara fram. Tó hevur arbeiðsgevarin altíð skyldu til við minst 8 daga freist at boða frá yvirtíðararbeiði í samband við uppteljing, langar leygardagar og jólavikuna.

§ 11 Avspáking

Stk. 1. Úrtíðarløn kann, um starvsfólk ynskir tað, og arbeiðsgevarin samtykkir, kompenserast við frítíð, ið svarar til úrtíðartakstin.

Stk. 2. Starvsfólk kann eftir ynski, og um arbeiðsgevarin samtykkir, keypa sær eyka frídagar.

Stk. 3. Arbeiðsgevarin tekur, í samráð við starvsfólkið, nærri avgerð um, nær frídagar sambært hesi grein skulu vera hildnir, og fráboðar hetta í góðari tíð t.v.s. vanliga ikki seinri enn 4 dagar frammanundan. Frídagarnir skulu, í tann mun tað er gjørligt, vera í heilum ella hálvum frídøgum og skulu, tá talan er um avspáking av úrtíð, vera av í seinasta lagi 2 mánaðir aftaná, at viðkomandi úrtíðararbeiði er útint. Frídagar sambært hesi grein kunnu ikki leggjast á dagar, sum eru frídagar annars.

§ 12 Parttíðarsett

Stk. 1. Fyri lutvísa arbeiðstíð verður goldin tímatakstur út frá tí ancienniteti, sum viðkomandi hevur.

Stk. 2. Fólk við lutvísari vikuligari arbeiðstíð frá 15 tímum og uppeftir verða at løna eftir somu reglum sum fólk við fullari viku, og verður lønin at rokna lutfalsliga í mun til 40 tíma vikuna.

Stk. 3. Fyri eykatímar millum kl. 7.30 og 18.00 vanligar yrkadagar og kl. 7.30 og 14.00 leygardagar fær viðkomandi vanligu tímaløn sína, meðan forskotin arbeiðstíð og úrtíðar arbeiði annars verður at samsýna við teimum í § 8 nevndu eykaviðbótum.

§ 13 Fyribilshjálp

Stk. 1. Fólk, ið verða sett til fyribilshjálp, fáa løn sambært lønartalvuni. Hevur starvsfólk yvirfluttan starvsaldur, skal hesin nýtast sum útrokningargrundalag fyri lønini.

Stk. 2. Sum fyribilsarbeiði er at skilja arbeiði, ið ikki varar longur enn í mesta lagi 3 mánaðar í einum og sama ári. Úrtíðargjøld eru tey somu sum fyri onnur.

§ 14 Persónlig viðbót til klinikassistentar

Eftir avtalu við arbeiðsgevaran kunnu klinikassistentar fáa persónliga viðbót soleiðis at henda viðbót verður ásett eftir:     

-     Førleika
-        Arbeiðsuppgávum
-        Ábyrgd.

§ 15 Løn fyri skeiðluttøku og eftirútbúgving

Stk. 1. Arbeiðsgevarin avger í samráð við starvsfólkið, hvørji skeið, starvsfólk kunnu luttaka í.

Stk. 2. Á arbeiðsplássum har tað er álagt starvsfólki at luttaka á skeiði, verða ásetingarnar í vegleiðingtil ferðauppgerð fyri tænastuferðir uttanlands hjá Fíggjarmálaráðnum at galda.

§ 16 Starvsaldur

Stk. 1. Starvsaldur er vanliga tað áramál, sum starvsfólkið hevur arbeitt innan viðkomandi øki.

Stk. 2. Starvsaldurin hjá faklærdum og útbúgnum er vanliga tað áramál, sum starvsfólkið hevur verið í arbeiði, ið er treytað av teirri útbúgving, tað hevur.

Stk. 3. Starvsfólkið fær roknaðan fullan starvsaldur, hevur tað í minsta lagi hálvt starv. Er talan um minni enn hálvt starv, verður starvsaldurin roknaður lutfalsliga.

Stk. 4. Til tess at fáa starvstíð frá nýggjum arbeiðsgevara skal starvsfólkið kunna um møguliga starvstíð frá øðrum arbeiðsgevara við setan og í seinasta lagi, tá setanarprógvið verður undirskrivað.

Kapittul 4: Setanarviðurskifti

§ 17 Lógarfest starvsfólkaviðurskiftir og frítíðarløn

Stk. 1. Hvat viðvíkur frítíð við løn, so verður víst til galdandi lóggávu, og er sama galdandi fyri sjúku, barnsburð o.t.

Stk. 2. Viðvíkjandi tíðarskeið, har starvsfólk eiga frí við løn, verður víst til galdandi lóggávu.

Stk. 3. Frítíðarpeningur fyri tímalønt (12%) verður fluttur á frítíðarkontoina hjá S&K-felagnum. Somuleiðis skal uppspardur frítíðarpeningur verða útgoldin á frítíðarkontoina hjá S&K-felagnum tá starvsfólk gevst í starvinum.

§ 18 Fastlønt

Stk. 1. Setanarprógv verða givin sambart lógtingslóg um setanarprógv, har upplýst skal vera m.a.:
-      navn arbeiðsgevarans
-      dagur fyri starvssetan,
-      starvsstað,
-      starvsøki,
-      starvsaldur
-      galdandi sáttmáli
-      møguligar aðrar avtalur í sambandi við starvssetanina.

Stk. 2. Starvsfólk skal vera sett sum fastlønt fulla tíð ella partíð ella sum tímalønt.
Starvsfólk, sum hevur verið tímalønt, og sum hevur arbeitt í minsta lagi 20 tímar um vikuna í miðal í meira enn 1 ár, hevur rætt til at gerast fastlønt.

§ 19 Lærlingar

Stk. 1. Lærlingur, sum tikin verður til upplæring í kramba- ella skrivstovuyrki, verður at løna í samsvar við lønartalvuna. 

Stk. 2. Er lærusáttmáli gjørdur fyri styttri tíð enn tey í lønartalvuni nevndu 4 árini, verður talið av lønarbólkum at minka samvarandi, soleiðis at tað eru teir seinastu satsirnir, ið verða at galda.

Stk. 3. Hvat annars upplæring av lærlingum viðvíkur, so verður víst til galdandi lóggávu um lærlingaviðurskifti.

Stk. 4. Ynskir lærumeistari at siga upp lærling í samband við, at hann hevur útstaðið lærutíð sína, so verður hetta at gera við 1 mánaða freist til tann 1.sta í einum mánaði.

Stk. 5. Fyri úrtíðararbeiði verður øll læruárini goldið lærlingum somu úrtíðarløn, sum galdandi er fyri fólk við lærlingaupplæring á 1. anciennitetsstigi.

§ 20 Uppsøgn

Stk. 1. Fyri fólk, ið eru sett sambært hesum sáttmála er uppsagnarfreistin sambært ásetingunum í starvsmannalógini.

Stk. 2. Fyri starvsfólk, ið eru sett sambært hesum sáttmála og ikki eru starvsfólk sambært starvsmannalógini, verður uppsagnartíðin 1 mánað frá øðrum partinum at galda.

Stk. 3. Uppsøgn smbr. stk. 1 og 2 skal vera skrivlig.

Stk. 4. Arbeiðsgevari hevur, tá setanin hjá starvsfólkinum endar, skyldu at geva teimum starvsfólkunum prógv um starvstíðina hjá starvsfólkinum.

Kapittul 5: Onnur gjøld

§ 21 Limagjald, lívstrygging og eftirløn

Stk. 1. Fyri at seta á stovn sjúkra- og arbeiðsloysisgrunn og fyri at stuðla onnur týðandi endamál innanfyri meginfelagsskapin S&K verður eitt gjald, ið er 2% av lønini frádrigið, áðrenn hon verður útgoldin.

Viðmerking: Hetta gjald skal í mesta lagi vera 350,- kr. um mánaðin.
Fyri lærlingar er hetta gjald 60 kr um mánaðin.

Gjaldið verður inngoldið av arbeiðsgevaranum til S&K, samstundis sum lønin verður flutt.

Stk. 2. Til lívstrygging og onnur sosial endamál verður eitt gjald uppá 2,0% av lønini frádrigið, áðrenn hon verður útgoldin.

Viðmerking: Hetta gjald skal í mesta lagi vera 350,- kr. um mánaðin.
Fyri lærlingar er hetta gjald 60 kr um mánaðin.

Gjaldið verður inngoldið av arbeiðsgevaranum til S&K, samstundis sum lønin verður flutt.

Stk. 3. Føroya Arbeiðsgevarafelag fær útflýggjað reglugerð fyri nevnda grunn.

Stk. 4. Hin 1. mai 2012 hækkar eftirlønargjaldið við 0,46% til 13,11%. Hesi prosent verða goldin inn á konto í navninum hjá eftirlønargrunni hjá S&K samstundis sum lønin verður goldin.

Hin 1. mai 2011 hækkar lønin við 1,23%. Hin 1. mai 2012 hækkar lønin 2,0%

Stk. 5. Arbeiðsgevarin hevur skyldu til einaferð um mánaðin at senda S&K-felagnum inn fullfíggjaðan lista yvir flutt limagjald, lívstryggingargjald og gjald til eftirløn.

Kapittul 6: Skipanarviðurskifti

§ 22 Samstarvsviðurskifti

Stk. 1. Partarnir eru samdir um, at teir hava felags áhuga í, at allir arbeiðsgevarar eru skipaðir sum limir í arbeiðsgevarafeløgunum, og at øll arbeiðsfólk eru skipaði sum limir í fakfelag.

Arbeiðsgevarafelagið arbeiðir fyri at kunna arbeiðsgevarar um teir fyrimunir, sum eru við limaskapi í arbeiðsgevarafelag. Somuleiðis arbeiðir S&K fyri at  kunna starvsfólk um teir fyrimunir, sum eru við limaskapi í fakfelag. Partarnir arbeiða fyri at tryggja, at verandi sáttmálar vera hildnir.

Stk. 2. Partarnir í hesi sáttmálagerð eru á einum máli um at fremja eitt gott samstarv.

Stk. 3. Eisini eru teir samdir um, at arbeiðsgevarin hevur rætt til at leiða, sundurbýta og nýta ta arbeiðsmegi, arbeiðsgevarin heldur vera fyri neyðuni, uttan tó at skerja tær sømdir, ið sáttmálin fyrisetur.

§ 23 Nevndararbeiði og álitismannaskipan

Stk. 1. Nevndarlimir í fakfelag hava rætt til frí frá arbeiði sínum í samband við nevndararbeiði, samráðingar og skeiðluttøku.

Stk. 2. Fráboðan skal gevast arbeiðsgevaranum beinanvegin tá nevndarlimur fær fundarboð.

Stk. 3.Viðvíkjandi skipanini við álitisfólkum, so verður víst til álitismannaskipanina, sum er partur av hesum sáttmála.

§ 24 Arbeiðssteðgur

Stk. 1. Partarnir viðurkenna rættin hjá hvørjum øðrum til at lýsa og seta í verk arbeiðssteðg eftir hesum reglum.

Stk. 2. Arbeiðssteðgur kann bert setast í verk um so er, at hann er samtyktur av einum aðalfundi við í minsta lagi 3/4 av atkvøðunum og rættstundis fráboðaður mótpartinum.

Stk. 3. At tað er ætlanin at leggja fyri aðalfund uppskot um arbeiðssteðg, skal kunngerast hinum partinum við serligum innskrivaðum brævi í minsta lagi 1 mánaða frammanundan, at arbeiðssteðgurin sambært uppskoti, er ætlaður at koma í verk, og skal á sama hátt gevast hinum partinum fráboðan um hvørja avgerð fundurin hevur tikið í minsta lagi 14 dagar frammanundan, at arbeiðssteðgurin verður at seta í verk.

Stk. 4. Sum arbeiðssteðgur er her at rokna streika, lock-out, blokada og boycot. Arbeiðssteðgurin kann ikki setast í verk, meðan sáttmálin er í gildi.

§ 25 Gerðarrættur

Stk. 1. Allar trætur um røttu fatan av sáttmálanum verða avgjørdar av einum gerðarrætti.

Stk. 2. Føroya Arbeiðsgevarafelag velur í henda gerðarætt 2 limir, felagið S&K 2 limir, og velja hesir 4 saman hin 5. gerðarrættardómarin, ið er ástøðumaður. Semjast teir ikki um valið av honum, setur Føroya Rættur hann.

Stk. 3. Gerðarrætturin ræður sjálvur fyri rættargangsskipan síni.

§ 26 Semingsstovnurin

Fæst ikki semja í lag partanna millum um nýggjan sáttmála er semja um, at semingsstovnurin, sum skrásettur er í lóg nr. 86 frá 31. mars 1928 um "Mægling i arbejdsstridigheder" við seinri broytingum, skal vera kompetentur viðvíkjandi viðvirkan til javnan av ósemjuni, og binda partarnir seg til at ganga undir tær í nevndu lóg ásettu reglur.

Kapittul 7: Aðrar ásetingar

§ 27 Arbeiðsklæðir 

Á arbeiðsplássum, har serligur búni verður kravdur, hevur arbeiðsgevarin skyldu at lata slíkan búna.

Kapittul 8: Gildisskeið

§ 28.  Gildisskeið 

Stk. 1. Hesin sáttmáli, ið fær gildið frá 1. mai 2011, kann sigast upp av einum av pørtunum við 3 mánaða freist til ein 1. mai, fyrstu ferð 1. mai 2013.

Stk. 2. Sjálvt um sáttmálin er uppsagdur, og tíðarfreistin fyri endurnýggjan er úti, skulu partarnir yvirhalda gamla sáttmálan til ein nýggjur er góðkendur ella arbeiðssteðgur er settur í verk eftir reglunum í § 24.

Tórshavn, tann. 13. apríl 2011

Føroya Arbeiðsgevarafelag                                                          S & K

Álitismannaskipan fyri S&K-limir


§1

Stk. 1.    Á arbeiðsplássum, har 3 ella fleiri fólk arbeiða, kunnu limir í S&K velja sær álitisfólk, ið verða vald fyri tvey ár í senn.

Stk. 2.    Á arbeiðsplássum har 8 fólk ella fleiri arbeiða kunnu limirnir í S&K eisini velja tiltaksfólk, ið verða vald á sama hátt sum álitisfólkið. Hesi skulu, tá álitisfólk hevur forfall, virka undir somu treytum og hava somu sømdir sum álitisfólkið.

Stk. 3.Valið av álitisfólki og tiltaksfólki skal góðkennast av arbeiðsgevaranum, ið kann broyta hetta eina ferð, men síðani verður 2. evni at góðtaka. Avgerð arbeiðsgevarans skal verða kunngjørd áðrenn ein vika er farin, annars er valið at rokna sum góðkent. Álitisfólkið kunnar S&K og arbeiðsgevaran um, hvør er valdur til álitisfólk/tiltaksfólk; valið skal eisini góðkennast av S&K.

§2

Stk. 1.    Álitisfólkið er umboð- og tingarfólk hjá S&K mótvegis leiðsluni og skal gera sítt til, at arbeiðið fer siðiliga fram.

Stk. 2.    Leiðslan og álitisfólkið eiga í felag at fremja eitt gott samarbeiði.

Stk. 3.    Álitisfólk skulu hava neyðuga kunning um tiltøk, sum ætlanin er at fremja, og sum kunnu hava ávirkan á arbeiðsumstøður teirra.


§3

Stk. 1.    Álitisfólkið skal bera fram klagur og tilmæli frá arbeiðsfeløgum til leiðsluna.

Stk. 2.    Álitisfólkið hevur eisini átalurætt viðvíkjandi ótrygd á arbeiðsplássinum. Sí annars løgtingslóg nr. 58 frá 24. mai. 1974.


§4

Stk. 1.    Um álitisfólk, tá samráðing er farin fram, ikki er komið til eina loysn við leiðsluna viðvíkjandi trupulleikum í arbeiðinum, sum S&K-limir ikki hava kunnað góðkent, skal málið beinanvegin leggjast fyri S&K-felagið og Føroya Arbeiðarafelag.

Stk. 2.    S&K-limir kunnu ikki leggja arbeiðið niður, fyrr enn nærri boð eru komin frá fakfelag teirra.


§5

Stk. 1.    Skyldur hjá álitisfólki skulu fremjast soleiðis, at tað sum minst tarnar arbeiðinum. Tá álitisfólk noyðast at fara úr arbeiði fyri at gera skyldur sínar, skal tað verða eftir avtalu við leiðsluna.

Stk 2.    Í hesum føri, eins og tá leiðsla boðsendir álisfólk um mál, ið hava við arbeiðsviðurskifti teirra at gera, skal álitisfólkið fáa ta vanligu lønina fyri ta tíð, tað er úr arbeiði.


§6

Stk. 1.    Uppsagnarfreistin hjá álitisfólki er vanlig uppsagnarfreist + ein mánaði. Við uppsøgnini skal fylgja grundgeving. Stendst uppsøgnin av vinnuloysi er sama galdandi fyri álitisfólk sum fyri vanligar limir annars.


§7

Stk. 1.    Verður ósemja um uppsøgn av álitisfólki, skulu feløgini beinanvegin taka upp samráðingar um hendan spurning.

Stk. 2.    Um eingin semja fæst millum feløgini verður trætan at viðgerða eftir §13.

Stk. 3.    Um arbeiðsgevarin heldur fast við uppsøgn sína, hóast gerðarætturin gongur honum ímóti, ásetur gerðarrætturin tað endurgjald, sum arbeiðgevarin skal gjalda álitisfólkinum. Støddin av hesum endurgjaldi verður at áseta eftir umstøðunum sum heild, men kann tó ikki setast til meira enn tvær mánaðarlønir (út yvir uppsagnarlønina).


§8

Stk. 1.    Broytingar í hesi álitismannaskipan kunnu bert gerast í sambandi við sáttmála-samráðingar.


§9

Stk. 1.    Um so er, at ivamál taka seg upp viðvíkjandi hesi skipan, skal samráðing fara fram millum feløgini.

Stk. 2.    Fæst ikki semja, verður málið at leggja fyri gerðarrætt sambært §13 í sáttmálanum.


Tórshavn, tann 9. mai 2005.


Føroya Arbeiðsgevarafelag                                                            S&K